Samrunanum lokið og tímamótum hjá Korda fagnað

Samruna Farice, Öryggisfjarskipta og tæknihluta Neyðarlínunnar er lokið og sameinað félag hefur hafið starfsemi undir merkjum Korda. Félagið tók formlega til starfa 1. september og sameinar rekstur mikilvægra fjarskipta- og öryggisinnviða landsins.

Daði Már Kristófersson fjármálaráðherra, Marta Eiríksdóttir, stjórnarformaður Korda, og Þorvarður Sveinsson, framkvæmdastjóri félagsins, fögnuðu tímamótunum við móttöku í höfuðstöðvum Korda föstudaginn 2. október og ávörpuðu gesti.

Með sameiningunni eru sérhæfð þekking og mikilvæg fjarskiptakerfi færð undir eina stjórn til að auka skilvirkni og styrkja rekstraröryggi. Korda annast m.a. rekstur fjarskiptasæstrengja sem tengja Ísland við umheiminn, Tetra-öryggisfjarskiptakerfisins og tæknikerfa sem styðja við starfsemi Neyðarlínunnar og viðbragðsaðila um land allt.